Şimali Kiprin ilk prezidentinin dəfnində Türkiyədən bir çox yüksək rütbəli məmur və siyasi lider iştirak edəcək

Yanvarın 13-də “Yakındoğu” universitetinin (YDU) xəstəxanasında vəfat edən Şimali Kipr Türk Respublikasının (KKTC) yaradıcısı və sabiq prezidenti Rauf Denktaş bu gün dəfn ediləcək. Məlumata görə, mərhum lider Lefkoşa şəhərindəki “Cumhuriyyət” parkında dəfn ediləcək.

Bu gün səhər saat 09.00-da mərhumla vida mərasimi başa çatacaq. Saat 10.00-da Denktaşın tabutu xüsusi avtomobilə qoyulacaq və saat 10.15-də “Səlimiyə” camesinə doğru hərəkət başlayacaq. Burada cənazə namazı qılındıqdan sonra tabut yenidən avtomobilə qoyulacaq və saat 12.45-də Kireniya (Girne) qapısına doğru hərəkət başlayacaq. Mərhum liderin nəşi saat 14.00-da “Cumhuriyyət” parkına aparılacaq və saat 14.30-da burada torpağa tapşırılacaq.

Rauf Denktaşın cənazə mərasimində Türkiyədən prezident Abdullah Gül, baş nazir Rəcəb Tayyib Ərdoğan, parlamentin spikeri Cəmil Çiçək, baş nazirin Kipr məsələləri üzrə müavini Bəşir Atalay və xarici işlər naziri Əhməd Davudoğlunun iştirak etməsi gözlənilir. Bundan başqa, mərasimdə indiyə qədər Türkiyəni Kiprdə təmsil etmiş diplomatlar da iştirak edəcək.

Siyasətçilərdən isə Cumhuriyyət Xalq Partiyasının (CHP) sədri Kamal Kılıçdartoğlu, CHP-nin sabiq sədri Dəniz Baykal, Milliyətçi Hərəkat Partiyasının (MHP) sədri Dövlət Baxçalı, Demokratik Sol Partiyanın (DSP) sədri Masum Türker, parlamentin sabiq spikeri Hikmət Çətin də iştirak edəcək.

Qeyd edək ki, ölkə rəsmilərini Rauf Denktaşin cənazə mərasiminə aparmaq üçün bu gün yerli vaxtla saat 09.00-da (Bakı vaxtıyla 11.00) Türkiyədən 2 xüsusi təyyarə uçacaq.
ANS