Rəsmi Dəməşq isə Liqanın təklif etdiyi planı rədd edib

Ərəb Dövlətləri Liqası Suriyadakı böhranın siyasi yolla nizamlanması barədə plan qəbul edib. Planda Suriyada 2 ay müddətinə Milli Birlik hökumətinin formalaşdırılması öz əksini tapıb. Hökumətin yardılmasından 3 ay sonra müəssislər məclisinə seçkilərin keçirilməsi, sonra isə yeni konstitusiyanın işlənilib hazırlaması məsləhət görülür. Daha sonra isə ərəb və beynəlxalq müşahidəçilərin nəzarəti altında prezident və parlament seçkilərinin keçirilməsi nəzərdə tutulur. Suriya ərəb dövlətləri liqasının bu planını rədd edib. Bu barədə məlumat verən Suriya hökumətinin rəsmi bəyanatında bildirilir ki, təklif olunan tədbirlər dövlətlərin daxili işlərinə kobud müdaxilədir və milli suverenliyə təhlükə yaradır. Suriya müxalifəti isə artıq Ərəb Dövlətləri Liqasının planını dəstəklədiyini və ölkədə davam edən böhranın siyasi yolla nizamlanmasını nəzərdə tutan yol xəritəsinin əsas bəndlərini yerinə yetirməyə hazır olduğunu bildirib. Qahirədə keçirilən mətbuat konfransında Suriya Milli Şurasının lideri Burhan Qalyun bildirib ki, Ərəb Dövlətləri Liqasının Suriya ilə bağlı planı BMT-nin TŞ-a təqdim etmək qərarını dəstəkləyir. Onun sözlərinə görə, hazırda beynəlxalq ictimaiyyətlə əməkdaşlıq çox vacibdir. Bütün bu hadisəldərin fonunda Suriyada vəziyyət hələ də gərgin olaraq qalır. Homs şəhərində bir qrup silahlı sərnişin avtobusunu qumbaratanlardan atəşə tutub. Nəticədə 11 nəfər ölüb, 3-ü isə yaralanıb. İdlib, Homs, Deraa, Deyr-əz-Zor şəhərlərində təhlükəsitzlik qüvvələrinin atəş açması nəticəsində 18 nəfərin öldüyü bildirilir.