Bəşər Əsədi dəyişmək planı iki dövləti yaxınlaşdırır

İran və ABŞ Suriyadakı böhranın daha da dərinləşməməsi üçün bir araya gəliblər. Fransanın “Le Figaro” qəzetinin mühacirətdə yaşayan suriyalı müxalifətçiyə istinadən verdiyi məlumata görə, hər iki ölkənin rəsmi nümayəndələri ölkədə vəziyyətin kritik həddə çatmaması üçün müzakirələr aparıblar.
Məlumata görə, qəzet diplomatlar arasında avqust və sentyabr ayında iki görüşün keçirildiyini yazıb. Amma görüşlərin harada aparılmasına dair məlumat verilməyib.
Qəzetə açıqlama verən suriyalı müxalifətçi, İran və ABŞ-ın Misirdə olduğu kimi Suriyada da ali hərbi şuranı hakimiyyətə gətirməyi və generallara önəmli strateji qərarlar qəbul etmək salahiyyətləri vermək istədiklərini deyib.
Başqa bir fransız diplomat da İran rəsmilərinin Dəməşqdə yeni hökumət qurulması fikrini bəyəndiklərini, hətta rejimin yüksək səviyyəli rəsmilərinin belə bu dəyişikliyi dəstəklədiklərini söyləyib.
Qəzetin yazdığına görə iki dəfə görüşən tərəflər bir-birilərinə qarşı şərt irəli sürüblər. Şərtə görə, ABŞ hərbçilərinin 2011-ci ilin sonuna qədər davam edəcək İraqdan çəkilmə prosesində İran bu ölkədəki nizamı pozmayacaq və bölgədəki terrorçu qruplaşmalara dəstək verməyəcək.
İran isə bunun əvəzində ABŞ-dan Bəşər Əsədin devrilməsindən sonra Suriyada Tehrana düşmən olan rejimi dəstəkləməməsini tələb edib.

7GUN.AZ