Məhkəmə Qərarlarının İcrası İdarəsinin rəisinin istefa verməsi barədə xəbərlər yayılıb

Ermənistan hakimiyyətində istefalar davam edir. Erməni mətbuatı bu istefaların kütləviləşməsini də istisna etmir. Bu gün isə Məhkəmə Qərarlarının İcrası İdarəsinin rəisinin istefa verməsi barədə xəbərlər yayılıb, erməni mətbuatı Qeqarkunik və Vayoçdzor vilayətlərinin qubernatorlarının da istefa verəcəyini də yazır. Ermənistan mətbuatında Məhkəmə Qərarlarının İcrası İdarəsinin rəisi Ayk Arutyunyanın istefa verdiyi barədə xəbərlər yayılıb. “Aykakan Jamanak” qəzetinin verdiyi məlumata görə, Qeqarkunik vilayətinin qubernatoru Nver Poqosyan və Vayoçdzor vilayətinin qubernatoru Sergey Baqratyan da istefa verməyə hazırlaşır. Qeyd edək ki, bu iki şəxs “Çiçəklənən Ermənistan” partiyasının nümayəndəsidir. “Aykakan Jamanak” üç gün əvvəl istefaya göndərilmiş Ermənistan Polisinin sabiq rəhbəri Alik Sarsyan Qeqarkunik vilayətinə qubernator təyin olunacağını yazıb. Tert.am saytının yaydığı məlumata görə isə, Ermənistan Prezidenti Nəzarət Xidmətinin rəhbəri Ovannes Ovsepyan, və “Çiçəklənən Ermənistan” partiyasından olan nazirlər də tutduqları vəzifələrdən istefa verəcəklər. Artıq işğalçı ölkənin siyasi gündəmində ciddi böhranın baş verdiyi müşahidə olunur.

7GUN.AZ